जमीन घोटाळ्याप्रकरणी वादात अडकलेले काँग्रेस अध्यक्ष सोनिया गांधी यांचे जावई रॉबर्ट वडेरा आणखी एका प्रकरणाने गोत्यात आलेत. जमीन व्यवहारांच्या आरोपांवर टीव्ही रिपोर्टरने प्रश्न विचारताच वडेरा भडकले आणि त्याचा माईक झटकला. या घटनेवरून वडेरांसह काँग्रेसवरही सडकून टीका होतेय. तर काँग्रेसने वडेरांची पाठराखण केली आहे.
दिल्लीतल्या फाईव्ह स्टार अशोकामध्ये हॉटेलमध्ये जिमच्या एका कार्यक्रमासाठी रॉबर्ट वडेरा आले होते. तिथे आलेल्या एएनआय न्यूज एजन्सीच्या रिपोर्टरने त्यांना सुरूवातीला जिमबद्दल प्रश्न केला आणि वडेरांनी त्याला सहजतेनं उत्तर दिलं. यानंतर रिपोर्टरने त्यांना हरियाणातील जमीन घोटाळाप्रकरणी प्रश्न करताच वडेरा एकदम भडकले. ‘आर यू सीरियस, आर यू सीरियस, आर यू सीरियस’ असं म्हणत वडेरांनी रिपोर्टरचा माइक झटकला आणि ‘कॅमेरा बंद कर’ असं दरडावलं. ‘तू मूर्ख आहेस का? काय अडचण आहे तुझी? या प्रश्नाच्या उत्तरासाठी तू योग्य नाहीस’, असं वडेरा धमकावून बोलले. इतकंच नाही तर वडेरांनी बॉडीगार्ड्सना सांगतिलं की ‘हे सर्व फुटेज लेगच डिलीट करा’.
डीएलएफ जमीन घोटाळाप्रकरणी चौकशी करणार असल्याचं हरियाणात सत्तेत आलेल्या भाजप सरकारने सांगितल्यानं रॉबर्ट वडेरांवर चौकशीची टांगती तलवार आहे. हरियाणा सरकारच्या निर्णयावरून जमीन घोटाळाप्रकरणी रिपोर्टरने वडेरांना प्रश्न केला होता. त्यावरून ते भडकले. या घटनेनंतर वडेरा यांच्या ऑफिसने एक पत्रक जाहीर केलं. ‘हॉटेलमधला कार्यक्रम खासगी होता आणि तिथे मीडिया नसेल असं वडेरांना वाटलं. तिथे आलेला खासगी फोटोग्राफर त्यांना असा का प्रश्न करतोय, तो एएनआयचा रिपोर्टर आहे हे वडेरांना माहीत नव्हतं’, असं त्या पत्रकात नमूद केलं आहे.
टीव्ही रिपोर्टरला केलेल्या धक्काबुक्की प्रकरणाने वडेरा वादात अडकलेत. वडेरांनी याप्रकरणी बिनशर्त माफी मागावी, अशी मागणी एडीटर्स असोसिएशनने केली आहे. तर ‘आपल्या सासूबाई सत्तेत नाहीत, हे रॉबर्ट वाडेरांनी लक्षात घ्यावं… वडेरांना नव्हे; तर इतरांनाच त्यांच्यापासून संरक्षणाची गरज आहे’, अशी बोचरी टीका भाजप नेते सुब्रमण्यम स्वामींनी केलीय. ‘वडेरांना उत्तर द्याचं नव्हतं तर त्यांनी नो कमेंट्स म्हणत विषय संपवला असता. पण रिपोर्टरशी अशी वर्तवणूक करणं योग्य नाही’, असं राष्ट्रवादीचे नेते नवाब मलिक यांनी सांगितलं. ‘ही वडेरांची मुजेरी आहे. फुटेज डीलीट करण्याचा अधिकार त्यांना कोणी दिला?, असा सवाल शाझिया इल्मी यांनी केलाय.
वडेरांनी पत्रकारांशी केलेल्या अरेरावीचा महाराष्ट्र पत्रकार हल्ला विरोधी कृती समितीने देखील निषेध केला असून वडेरां यांनी पत्रकारांची तातडीने माफी मागावी अशी मागणी केली आहे.
