‘टॅक्स हेवन’ म्हणून ओळखल्या जाणाऱ्या स्वित्झर्लंडच्या एचएसबीसी बँकेत २०३ देशांमधील जवळपास एक लाख धनाढ्य मंडळींची खाती असून त्यापैकी ११९५ भारतीय खातेदार असल्याची खळबळजनक माहिती फुटली आहे. २००६-०७ या वर्षांत या भारतीयांच्या खात्यात तब्बल २५ हजार ४२० कोटी रुपये जमा असल्याचंही उघड झाल्यानं देशात मोठा ‘धमाका’ होण्याची शक्यता आहे.
दरम्यान, परदेशातील बँकांमध्ये बेकायदेशीरपणे अब्जावधी रुपये दडवणाऱ्या सुमारे ६० खातेधारकांची नावं केंद्र सरकार जाहीर करणार असल्याचं सूत्रांकडून समजतं. त्यात बडे उद्योगपती, काँग्रेसचे नेते, राजकारण्यांचे नातेवाईक, बॉलिवूड तारे-तारका, हिरेव्यापारी, अनिवासी भारतीयांची नावं असल्याचीही कुणकुण लागली आहे.
एचएसबीसी बँकेतील खातेदारांची यादी फ्रान्सच्या ‘ले मोंद’ या वृत्तपत्राला फ्रान्स सरकारमधील सूत्रांकडून मिळाली. तिथल्या काही मंडळींनी ती वॉशिंग्टनच्या पत्रकारांना पाठवली आणि आता ती देशातील प्रसारमाध्यमांच्या हातीही लागली आहे. खरं तर, काळा पैसा प्रकरणी स्विस बँकांमधील भारतीय खातेदारांची एक यादी २०११ मध्ये फ्रान्सनं केंद्र सरकारला दिली होती. त्यात ६२८ भारतीय खातेदारांची नावं होती. परंतु, नव्या यादीत ही संख्या दुप्पट झाली आहे. एचएसबीसी बँकेतील ११९५ खातेदार भारतीय असल्याचं समोर आलंय. त्याहीपेक्षा, या मंडळींच्या खात्यात २००६-०७ या वर्षांत तब्बल २५ हजार ४२० कोटी रुपये जमा असल्याचा धक्कादायक आकडाही फुटलाय. एचएसबीसी बँकेतील एकूण ठेवी साधारण ६२ लाख कोटी (१०० बिलियन डॉलर) असल्याचं समजतं. या यादीमुळे काळा पैसा जमवणाऱ्यांभोवतीचा फास आवळला जाऊ शकतो.
काळ्या पैशाचा मुद्दा लोकसभा निवडणुकीदरम्यान चांगलाच गाजला होता. त्यानंतर, परदेशात लपवलेला काळा पैसा देशात परत आणण्याची ग्वाही पंतप्रधान नरेंद्र मोदींनी दिली होती. त्या दिशेनं पावलं टाकायला केंद्रानं सुरुवात केल्याची माहितीही सूत्रांनी दिली आहे. काळा पैसा दडवणाऱ्या ६० जणांची यादी लवकरच जाहीर होण्याची शक्यता आहे. अर्थात, वर्तमानपत्रातून नावं जाहीर झाली असली तरी ठोस पुराव्यांशिवाय कारवाई करता येत नाही, असं केंद्रीय अर्थमंत्री अरुण जेटली यांनी स्पष्ट केलंय. वर्तमानपत्रातील माहिती २००६-०७ या वर्षांतील आहे आणि आमची चौकशी २०१४ मध्ये सुरू झालेय. त्यामुळे खातेदारांना सहा-सात वर्षांचा कालावधी मिळालाय, याकडे त्यांनी लक्ष वेधलं. तरीही, आपण या प्रकरणी वेगानं चौकशी करून परदेशातून पैसे परत आणू, असंही त्यांनी नमूद केलं. त्यामुळे बड्या-बड्या मंडळींचं धाबं चांगलंच दणाणलंय.
माझ्या कुटुंबांपैकी कुणाचेही परदेशी बॅेकेत खाते नाही-राणे
स्वित्झर्लंडच्या एचएसबीसी बँकेत काळा पैसा लपवलेल्या धनाढ्य खातेदारांमध्ये राज्याचे माजी मुख्यमंत्री नारायण राणे यांच्या पत्नी नीलम आणि मुलगा निलेश यांचंही नाव असल्याची माहिती समोर आल्यानं राणे कुटुंब संशयाच्या फेऱ्यात अडकलं आहे. परंतु, परदेशातील कुठल्याही बँकेत आपलं किंवा आपल्या कुटुंबातील कुणाचंही खातं नसल्याचा स्पष्ट खुलासा करून नारायण राणेंनी या सर्व चर्चांवर पडदा टाकायचा प्रयत्न केलाय.
एचएसबीसी बँकेतील लाखभर खातेदारांपैकी ११९५ खातेदार भारतीय असून त्यांच्या खात्यात तब्बल २५ हजार ४२० कोटी रुपये जमा असल्याची गंभीर आणि धक्कादायक माहिती फुटल्यानं देशात खळबळ उडाली आहे. या खातेदारांची नावं ‘इंडियन एक्सप्रेस’ या वृत्तपत्रानं छापली आहेत. त्यात मुकेश आणि अनिल हे अंबानी बंधू, जेट एअरवेजचे नरेश गोयल, ‘डाबर’चे बर्मन या उद्योगपतींसोबत राजकारण्यांच्या नातेवाईकांचीही नावं आहेत. काँग्रेस नेते नारायण राणे यांच्या पत्नी नीलम आणि त्यांचा मुलगा माजी खासदार निलेश यांचीही एचएसबीसी बँकेत खाती असल्याचं समोर आलंय. त्यांची नेमकी किती रक्कम तिथे जमा आहे, हे उघड झालेलं नाही, पण त्यावरून राज्याच्या राजकीय वर्तुळात चर्चांना उधाण आलंय.
या पार्श्वभूमीवर, नारायण राणे यांनी प्रसारमाध्यमांशी बोलताना हे वृत्त खोडून काढलं. स्विस बँकेत माझं खातं नसल्याचं मी याआधीही स्पष्ट केलंय आणि आता पुन्हा करतोय. माझं किंवा माझ्या कुटुंबातील कुणाचंही खातं परदेशी बँकेत नाही, असं राणेंनी घुश्श्यातच सांगितलं. त्याचवेळी, त्यांचे चिरंजीव निलेश यांनीही या संदर्भात खुलासा केलाय. राणे कुटुंबातील कुणाचाही अशा खात्याशी संबंध नाही, काँग्रेसमधील काही ताकदवान नेत्यांविरोधात हे षड्यंत्र रचलं जातंय, असा आरोप त्यांनी केला.
दरम्यान, काँग्रेसचे दिवंगत मंत्री वसंत साठे यांचे कुटुंबीय आणि शिवसेनाप्रमुख दिवंगत बाळासाहेब ठाकरे यांच्या सूनबाई स्मिता ठाकरे यांचंही एचएसबीसीमधील खातेदारांच्या यादीत नावं आहे. त्यांनी याबद्दल अद्याप कुठलीही प्रतिक्रिया दिलेली नाही.( मटावरून साभार )
